தீர்ப்பை மாத்து!

நாட்டாமை பூமிநாதன் தலைமையில் ஊர்க் கூட்டம் நடந்து கொண்டிருந்தது.

``நாட்டாமை, நம்ம ஊர் அம்மன் கோயிலுக்குத் தேர் செஞ்சு தேரோட்டம் நடத்த ஏற்பாடு செய்யுங்க'' என்றார் ஒருவர். அதைப் பலரும் ஆமோதித்துப் பேசினர்.

இச்சமயம் கூட்டத்திலிருந்த ஒரு இளைஞன் எழுந்து ``நாட்டாமை என்னை மன்னிக்கணும். தேர் செய்யுறது நல்லதுதான். அதுக்கு முன்னாலஒரு வண்டி செய்யணும்'' என்றான்.

``ஏய், என்ன பேசுற? வண்டியில ஏத்தித்தான் பொணம் சுடுகாட்டுக்குப் போகுமோ?பாடை கட்டித் தூக்கிட்டுப் போனா போகாதோ? போகமாட்டேன்னு சொல்லட்டும், அப்ப பார்த்துக்கிடலாம்'' என்று அந்த நடுத்தர வயதுக்காரர் கிண்டலடித்தார்.

அந்த இளைஞனின் கண்கள் சிவந்தன. அவரைப் பார்த்து ``நெஞ்சுல கை வைச்சுச் சொல்லுங்க. இன்னிக்கு வரைக்கும் முள்காட்டுக்கு நடுவுல இருக்கிற சுடுகாட்டுக்கு எப்பவாவது பொணம் சுமந்துருக்கீங்களா?'' என்றான்.

கூட்டம் தலை கவிழ்ந்தது.

நாட்டாமை எழுந்து ``தூக்குறவனுக்குத்தான் தோள் வலி தெரியும். அவன் சொன்னதை நானும் ஆமோதிக்கிறேன். நாம இப்ப தேரைப் பற்றிப் பேச வேண்டாம். அவன் சொன்னது மாதிரி வண்டிதான் தேவை. நாளைக்கே வண்டி செய்ய ஏற்பாடுகள் நடக்கும்'' என்றார்